Һонин нюур

Илалтын һайндэртэ зорюулагдаһан Россиин арадуудай ехэ хурал болобо

 

Эсэгэ ороноо хамгаалгын Агууехэ дайнда илалтын 65 жэлэй ойдо зорюулагдаһан «Арадуудай хани барисаан – Агууехэ Илалтын арга нүхэсэл» гэжэ нэрэтэй Россиин арадуудай VIII Конгресс Москва хотодо үнгэрбэ. Тэрэнэй хэмжээн соо Россиин арадуудай Ассамблейн V cъезд ба «Россиин һолонго» гэжэ VII Бүхэроссиин арад үндэһэтэдэй фестиваль болоһон байна. Россиин Президентын дэргэдэхи Буряад Республикын Бүрин эрхэтэ түлөөлэлгын пресс-албанай мэдээсэһэнэй ёһоор, съезд дээрэ 80 хүнэй бүридэлтэйгөөр «Россиин Арадуудай Ассамблей» гэжэ Бүхэроссиин олониитын эмхиин зүблэл һунгагдаа.

Россиин Арадуудай Ассамблейн зүблэлдэ буряад яһатаниие Москвагай буряад соёлой нэгэдэлэй түрүүлэгшэ Батор Дугарович Дугаров ба Зоя Юмцараевна Цыренова хоёр түлөөлнэ. Арад үндэһэтэдэй «Россиин һолонго» фестивальда ямар программанууд байгааб гэбэл: «Дүшэн табан оной хабар» - зүжэгэй түхэлэй тоглоон; «Россиида дуратайб», зохёохы бүлгэмүүдэй ба фестивальда амяараа хабаадаһан артистнуудай наада тоглоон; тамиршадай олониитын үмэнэ мүрысөөн, спортын үндэһэн янзанууд; ВВЦ-н (Бүхэроссиин үзэсхэлэнэй түб) гол гудамжада һайндэрэй яармаг. Конгресстэ хабаадагшад Россиин Федерациин Президентдэ, Россиин Федерациин Федеральна Суглаанда, Правительствада, улас түрын гол партинуудта ба ниитын нэгэдэлнүүдтэ,ороной бүхы яһанай эрхэтэдтэ, гитлертэ эсэргүү нэгэдэлэй аха дүү арадуудта Хандалга абаһан байна. Тэрэ мэдүүлгэ соогоо Конгресс иигэжэ онсолбо: «Ороной үндэһэ яһатадай ниитын нэгэдэлнүүд Агууехэ Илалтын түүхэтэ дүршэл хараада абан олон үндэһэтэ ниигэмые нэгэдүүлхэ хэрэгтэ, Россиин үндэһэ яһанай илгаралгүй арад бүхэнэй, эрхэтэн бүхэнэй онсогой шанарые болон эрхим зэргые батажуулгада, арадуудай нүхэр ёһоной хани барисаанда бүхы талаһаань туһа хүргэхэнь дамжаггүй. Бидэ Россиие зохёохы шанартай, олон янзаараа болон нэгэн бүхэлеэрээ омогорходог арадуудай эблэл – дэлхэйн удха шанартай, бэлиг шадабаряараа ба хүн түрэлхитэндэ хүргэхэ оюун сэдьхэлэйнгээ нүлөөгөөр агууехэ шадалтай, ерээдүй тээшэ  эрмэлзэһэн арад болохыень хүсэнэбди. Фашизмые манай эхэ эсэгэнэртэй сугтаа илажа гараһан оронуудтай болон арадуудтай Россиие хани халуун нүхэрсэг болохыень хүсэнэбди». Россиин арадуудай Конгресс эмхидхэгшэд гэхэдэ Россиин Арадуудай Ассамблей, Россиин Арадуудай Байшан, ОАО «Бүхэроссиин үзэсхэлэнэй түб гэжэ гүрэнэй бэеэ даанги нэгэдэл», Россиин Федерациин Соёлой министерствын, Москвагай гүрэнэй соёл урлалай университедэй, Россиин Федерациин Спортын, аяншалгын ба залуушуулай талаар үзэл ябуулгын министерствын, Россиин Федерациин Сэрэгэй министерствын дэмжэлгэтэй байба.

---