Һонин нюур

Буряад Монгол хоёрой хоорондо эд бараанай эрьесэ ургажа байна

 

Россиин Федерациин ба Монголой гадаадын харилсаанда эдэ оронуудай хилэ шадарай можонуудай хоорондохи холбоо барисаан эзэлнэ. Монгол хадаа Буряад Республикын худалдаа наймаанай-экономикын харилсаануудта гол һууринуудай нэгые эзэлдэг юм.

Мүнөө сагта Буряад Республикын Монголдо гаргаһан эд бараанай янзанууд соо эдеэ хоол ехэнхи хубииень эзэлнэ. Жэшээлхэдэ, һү ба һүөөр хэһэн зүйлнүүдые (115 хэсэг – 684,8 т.), малай ба ургамалай тоһо хилээр гаргалгын хэмжээн ургажа байна. Монголһоо асарһан зүйлнүүд соо эбэртэ бодо малай мяхан (2241,7 т.), мориной мяхан (45 хэсэг – 911,1 т.) болон хониной мяхан (2 хэсэг – 38,1 т.) гол һуури эзэлнэ. Монголһоо мяха оруулалга Россельхознадзорой хилэ болон транспорт дээрэ ветеринариин хиналтын  Буряад Республикадахи таһагай мэргэжэлтэдэй харууһан доро байдаг. ООО «Бурятмясопром» бүлгэмдэ Монголһоо болбосоруулха гэжэ асарагдаһан мяханай хэмжээн 2010 оной 4 һара соо 3190,9 тоннодо хүрэбэ.

Майн 1-нэй байдалаар Монголһоо мал оруулха тухай хоёр хэлсээн баталагдаад байна, Зэдын аймагай Доржи Банзаровай нэрэмжэтэ хүдөөгэй үйлэдбэриин кооператив 5 мянган толгой хони ба 1 мянган толгой эбэртэ бодо мал, мүн «Захааминай мяханай комбинат» бүлгэм 15 мянган толгой эбэртэ бодо мал оруулха гэлсээд байна. Буряад Республикын Хүдөө ажахын ба эдеэ хоолой министерствэһээ мэдээсэһэнэй ёһоор, нэгэдэхи хэлсээгээр үүлтэртэ мал үдхэхын тулада оруулха зүбшөөл абаха тухай Россиин Хүдөө ажахын министерствэдэ эльгээһэн асуултада харюу хүлеэжэ байна. Хоёрдохи хэлсээгээр мал оруулха талаар тамуужанай, хилын ба ветеринариин албантай хэгдэхэ саарһа дансанууд албан түхэлдэ оруулагдажа байна.

 

---