Һонин нюур

«Эзнис Эйруэйз» Улаан-Баатар –Улаан-Үдэ хотонуудай хоорондо саг үргэлжын ниидэлгэ хэжэ эхилбэ

 

Июниин 1-дэ Буряад болон Монгол хоёрой хоорондо «Улаан-Баатар – Улаан-Үдэ» гэһэн замаар саг үргэлжын агаараар харилсалгын нээлтын баяр болохонь. Шэнэ замые «Эзнис Эйруэз» («Eznis Airways») гэжэ монголой залуу авиакомпани үүдхэбэ. Саг үргэлжын ниидэлгэнүүд хоёр талын социально-экономическа хүгжэлтэдэ, мүн угсаатанай соёлой харилсаанда туһа хүргэхэ зэргэтэй, илангаяа Улаан-Үдэ хотодо зундаа болохоёо байһан дэлхэйн монголшуудай конвент үнгэргэлгын урда тээ ехэ удха шанартай.

Буряад Республикын Транспортын, элшэ хүсэнэй һалбариин ба харгын ажахын министерствэдэ болоһон уулзалгада эхин дээрээ гаршань ехэшье һаа неделиин хоёр удаа - гарагай гурбанда ба долоондо тус рейс бэелүүлэгдэдэг байха гэжэ тэмдэглэгдэбэ. Швецидэ хэгдэһэн «SAAB-340B» гэжэ турбовинтовой мотортой самолет 30 хүниие багтаадаг юм. Ниидэхэ сагынь 1 час 10 минута болоно. Ниидэхэ дуратай хүнүүдэй олон болоо һаань, үшөө нэгэ рейс нэмэгдэхэ. Агаарай шэнэ замай гарша хороохын тулада «Aerofuels – Улаан-Үдэ» бүлгэм түлишын сэн тонно бүхэнһөө 1000 түхэригөөр доошолуулһан байна. «Аэропорт Байкал (Улаан-Үдэ)» бүлгэм аэропортдо туһа хангамжын сэн 40% бага болгоо. Саг үргэлжын уласхоорондын рейс нээгдэһэнһээ уламжалан Буряадай ба КНР-эй Үбэр Монголой бэеэ даанги районой хотонуудай хоорондо агаарай зам тогтоохо арга боломжо олдоно. Буряад Монгол хоёрой хоорондо авиациин харилсаа  нээхэ тухай хэлсээн 2008 ондо баталагдаа һэн. 2009 оной хабар Буряадай ниислэл хотын аэропортдо хилэ гаталалгын уласхоорондын пункт нээгдээ. Тэрэнэй ашаар ганса нэгэ бэшэ, саг үргэлжын уласхоорондын ниидэлгэнүүдые эмхидхэхэ арга олдобо. 2009 оной август һара соо Россиин Федерациин Президент  Дмитрий Медведевэй Монголдо айлшалхадань монгол-орос харилсаан тухай хэлсээнүүдтэ Монгол ба Буряад хоёрой хоорондо агаарай харилсаа нээхэ гэжэ бэшэгдэһэн байна.

---