Һонин нюур
08.06.10 17:29 Давность: 93 удэр
Буряадта орос-монголой хилэ дээрэ гаталалгын пунктнууд түхеэрэгдэнэ
Буряад Республикын Президент ба Правительство Монгол оронтой харилсаа бэхижүүлгын ба үргэдхэлгын асуудалда саг үргэлжэ һанаагаа табина. Тиимэ зорилготойгоор орос-монголой хилын Буряадай участогта хилэ гаталалгын пунктнуудые түхеэрхэ талаар эдэбхитэй ажал ябуулагдана.
2008 - 2009 онуудта «Наушки» станци һэльбэн шэнэлэгдээ. Уласхоорондын автомашинын гаталалгын «Хяагта» пунктые һэльбэлгын проект зохёолгын-мүнгэнэй түсэбэй саарһа данса бэлдэгдэжэ байна, тэрээнэй ашаар автомашинанууд түхэреэлжэ бэшэ, сэхэ гарадаг болохо, тиигэжэ олон машина ажаллаха арга бии болохо. «Россиин Федерациин гүрэнэй хилэ 2012-2017 онуудта» Федеральна тусхай программын түлэбөөр МАПП «Хяагта» пунктые һэльбэлэн шэнэлхэ ба «Айнек-гол» ба «Желтура» гэжэ хоёр талын автомашинын пунктнуудые бариха талаар хэмжээнүүд хараалагдаа. 2009 ондо «Желтура» пунктын хажуудахи харгын Зэдэ гол дээгүүр хүүргэ баригдажа, ашаглалда тушаагдаа. 2010 ондо «Моондо» гэжэ автомашинын пунктда барилгын хүдэлмэри эхилхээр түсэблэгдэнэ. Энээндэ 2010 ондо 100 миллион түхэриг һомологдоо. Гаталалгын пунктые хоёр гүрэнэй бэшэ олон уласай зэргэтэй болгохо тухай асуудал шиидхэгдэхэ шатадаа хүрэнхэй, тиин орос-монголой хилые гадаадын ондоо оронуудһаа аяншалагшадай гарахаар арга бии болохо. 2009 оной хабар Буряадай ниислэл хотын аэропортдо агаараар хилэ гаталалгын пунктын хүдэлмэри һэргээгдээ, тэрээнэй ашаар ганса нэгэ бэшэ саг үргэлжын уласхоорондын рейснүүдые эмхидхэхэ арга боломжо бии болобо. 2010 оной июниин 1-дэ Буряад Монгол хоёрой хоорондо «Улаан-Баатар – Улаан-Үдэ» замаар саг үргэлжын агаарай холбоо зам нээлгын баяр ёһолол болохо юм.
|
